Becik ketitik Ala ketara

Carefree Arizona real estate

2010-10-12T21:22:00.003+07:00

Owning or renting a house in the cool and comfortable area is the dream of every person. Home is a hangout place for the whole family, also take shelter from the heat, rain, snow and wind.
Carefree Arizona real estate is one option for you. Carefree Arizona real estate provides a home for purchase or lease. Various kinds of homes available for you. Strategic location, easy accommodation , and adequate public facilities.
Immediately ordering before run out. You will not regret investing your money buying or leasing a home in Carefree Arizona real estate.

Siyam

2010-08-04T08:04:00.002+07:00

Sampun sakwetawis dangu, kula mboten nyerat wonten blog punika. Pakaryan ingkang sampun dados tanggel jawab kula, mboten tega menawi kula tilar namung kagem ngopeni blog punika. Badhe pados wekdal, nyempil-nyempil wekdal, kok nggih dereng wonten ingkang pas. Pungkasanipun lha nggih kados punika, blog mboten kopen ngantos pinten-pinten wekdal.

Wekdal punika, kula peksa nyerat, mboh mangkih kados pundi uninipun, ingkang wigati wonten seratan enggal, supados mboten ketingal menawi ingkang nggadahi blog punika sampun tinggal glanggang colong playu. Sakmangkih menawi dangu mboten ditingali, jarene tiyang sepuh mangkih saged dinggeni gendruwo, hiiiiii ......

Kleresan menika nyedaki wulan siyam utawi Romadhon, kula ngilingaken mliginipun kagem kula piyambak, supados enggal enggal ngawontenaken persiyapan. Sanajan siyam Romadhon punika rutinitas ingkang kedah dipun lampahi saben tahun. Menawi saged nggih kuwalitasipun dipun tingkataken, sampun ngantos kuwalitas siyam tahun punika sami utawi malah langkung awon tinimbang siyam tahun kepengker.

Menawi namung nyegah napsu dhahar, ngunjuk utawi kempal kalihan garwa menika kula kinten mboten awrat. Langkung entheng tinimbang nalika nglampahi siyam sunah kados siyam Senen Kemis utawi siyam sanesipun. Sebab, kathah tiyang wonten ing wulan Romadhon sareng sareng ngalmpahi siyam. Nanging, nyegah napsu sanes kados srei, dengki, ngglendhengi awone tiyang, ingkang tuwuh saking sakjeroning ati, ngantos kawedal wontening lathi menika sing uangelipun mboten memper. Pramila leres ngendikanipun kanjeng Nabi, menawi siyam menika ganjarene kados nderek perang mbelani agama utawi negara.

Mugi-mugi siyam tahun menika, kula lan panjenengan saged nglampahi kanthi sae, lan sak sampunipun wulan Romadhon saged wangsul malih dados tiyang enggal ingkang langkung sae, amin.

Ngeblog dulu, Baru Tanya Manfaatnya

2009-12-15T08:31:00.001+07:00

Nyuwun sewu bilih irah-irahanipun mboten mawi boso Jawi, paling mboten kersane irah-irahan punika saged dipun waos dhening masyarakat Indonesia saking Sabang dumugi Merauke. Kula nekad nderek sayemboro ingkang dipun wontenaken dhening mas Yayat, sanadyan ngagem basa Jawi. Sebab wonten persyaratan peserta lomba mboten nyebataken menawi postingan kedah ngagem basa Indonesia.

Masalah manfaat ngeblog, kathah tiyang ingkang nangletaken manfaatipun rumiyen. Menawi manfaatipun kirang sreg lan mboten mranani ing penggalihipun, lajeng nggeblas tinggal glanggang colong playu mboten sios ngeblog. Sebagian tiyang taksih ngukur samubarang saking manfaatipun secara finansial. Menawi wonten opahanipun ingkang awujud dolar utawi arta, nembe semangat, nanging menawi mboten, lha nggih mangkih rumiyen utawi wasalam kemawon. Sanajan blog punika nggih saged kagem pados arto, nanging menawi tujuan awalipun mekaten, biasanipun mesthi gelo, sebab supados blog menika saged ngasilaken, betah wekdal ingkang dangu.

Sejatosipun, manfaat ngeblog punika saged dipun raosaken menawi sampun nyemplung ndamel blog, lan sesambetan kaliyan blogger-blogger sanesipun. Sansaya dangu, sansaya mbalung sungsum kanikmatan lan saged dipun raosaken manfaatipun ngeblog punika. Dhene manfaat ngeblog punika antawisipun:

Nambah sedulur, sanajan tebih, dereng nate pirsa praupanipun, tetep kemawon kraos rumaket.
Nambah ngelmu, kanthi ngeblog, purun mboten purun kedah sinau supados blogipun pantes kapacak wonten internet. Mulai sinau ngothak athik template, ngowahi kode HTML lan sakpanunggalanipun.
nambah sangu, nha, menika biasanipun ingkang dipun uber dhening calon blogger. Nanging perlu dipun mangertosi dene sangu punika saged kagayuh kanthi perjuangan ingkang dangu. Kanthi masang pariwara, damel blog review lan sanes-sanesipun
lan sak sanes-sanesipun.

Wonten mriki perlu kula garis bawahi malih bilih manfaat ngeblog menika saged dipun raosaken menawi sampun damel blog, lajeng sesambetan lan mertamu wonten blogipun kadang sanes. Dados, menawi kepingin mangertosi manfaatipun ngeblog, nggih kedah damel blog rumiyen.

Guru Ugi Namung Manungsa

2008-11-22T15:54:00.002+07:00

Nalika kula ningali pawartos wonten ing salah satunggaling televisi swasta 3 dinten kepengker, dipun wartosaken bilih wonten ing daerah Tapanuli, wonten salah satunggaling guru SD, sebat mawon asmanipun pak Dongkrak (mboten asma aslinipun), tumindak nerak paugeran, ngrudaparipeksa siswinipun. Tumindak punika dipun lampahi wongsal-wangsul, lan ingkang nggegirisi malih, tumindak punika dipun pirsani dhening kanca-kanca siswi wau wonten ing ngajeng kelas. Kanthi pangancam menawi siswi-siswi ingkang sampun dipun rudaparipeksa matur kalihan sinten kemawon, tiyang sepuh, guru punapa pulisi, temtu siswi wau badhe pun ukum dening pak Dongkrak. Rumaos dipun ancam, lare alit temtu kemawon mboten wantun matur sinten kemawon. Ananging, nyimpen endog bosok mesti kemawon mambu. Tiyang sepuhipun ingkang mangertosi wontening keanehan ingkang dipun alami dening putrinipun, nyuwun pirsa kalihan kanca-kancanipun sak kelas. Saking mriku, tumindakipun pak Dongkrak kawiyak. Mboten nengga gantos dinten, tiyang sepuh korban lapur dateng kantor pulisi. Pak pulisi inggal tumindak, nanging, pak Dongkrak kados sampun mangertos menawi wadinipun sampun kawiyak, pramila piyambakipun mlajar tinggal glanggang colong playu.
Ingkang ndadosaken raos mboten sekeca wonten ing manah kula inggih punika irah-irahan pawartos "Bobroknya pendidikan di Indonesai". Kados sampun mboten wonten malih guru ing Indonesia punika ingkang sae. Pancen wonten guru ingkang mboten sae rumindakipun, nanging cacahipun temtu mboten kathah. Napa malih menawi dipun prosentase antawisipun guru ingkang awon kalihan sedaya guru sak Indonesia, mesthi namung sekedhik tinimbang pejabat ingkang tumindak nyimpang kalihan sedasya pejabat sak Indonesia.
Pancen saged dipun arani apes dados guru punika, miturut kerata basa, guru punika digugu lan ditiru. Nanging kedah dipun enget ugi, guru nggih manungsa sawantah, ingkang kedunungan salah. Dados ampun digebyah uyah, menawi wonten guru ingkang salah, nyimpang, bobrok lsp, sedaya guru, cethanipun malih pendidikan wonten ing Indonesia punika bobrok.
Kagem bapak lan ibu guru, nderek mangayubagya dinten guru tahun 2008. nuwun.

Filem Action

2008-08-09T07:04:00.004+07:00

Sinten ingkang mboten remen ningali filem. Para wanita remen filem jinis drama, crita ingkang saged damel luh lumeber, lan crita crita sanes ingkang tebih saking sifat kekerasan. Pancen sifating wanita punika sarwa alus lan lembut sanajan sanes lelembut.

Dene sipating pria punika umumipun (mboten sedaya) kasar lan keras (ingkang dipun remeni wanita nggih perangan ingkang keras punika). Sipat punika ugi nyebabaken filem ingkang dipun remeni piyayi kakung filem jinis action, ingkang kathah nggambaraken kepruk-keprukan, jotos-jotosan, bedhil-bedhilan, wutahing ludira, tatu arang kranjang lan sakpanunggalanipun. Filem-filem action wonten ingkang saking lebet negeri, barat (umumipun hollywood), mandarin lan bollywood.

Filem-filem action lokal menawi dipun pirsani, kirang sanget mutunipun. benten kalihan filem action saking njawi negeri. Mliginipun filem saking hollywood, mutunipun sae sanget. Ingkang nonton mesthi rumaos marem. Sedaya ingkang dipun gambaraken kados nyata lan kedadosanipun kados mboten dipun damel. Pancen wragat ingkang dipun dalaken kagem paraga pengganti (stuntman), spesial effek, swara lsp kathah sanget,pramila hasilipun nggih sae. Benten kalihan filem action lokal ingkang wragatipun cupet, hasilipun nggih temtu kemawon sakmadya.

Filem-filem action sakmenika kanthi gampil dipun tingali wonten ing TV lan kaset VCD. Filem jenis punika ugi saged dipun tingali dhening lare-lare alit. Lare-lare punika dereng saged mbentenaken antawisipun kedadean saestu punapa namung apus-apus. Tiyang sepuh kedah tansah ngrencangi putra-putranipun nalika ningali filem mliginipun jenis action. Putra jaler kula semanten ugi, remen sanget ningali filem action.

Saking sak kathahe filem action, kula piyambak paling remen kalihan filem-filemipun Jacky Chan. Amargi filem-filemipun Jacky Chan menika biasanipun tebih saking unsur pornografi. Sanesipun, wonten ing perangan akhir filem, mesthi dipun tingalaken kedadosan nalika mundhut gambar. Umpaminipun nalika olah tandhing, ingkang kadosipun tananan, nanging nalika wonten ingkang klentu, para paraga wau sami-sami gumujeng. Benten sanget kalihan wonten filemipun. Perangan punika mbiyantu sanget paring pangertosan kagem putra kula, bilih sedaya kedadosan ing filem punika namung apus-apus. Saktemenipun tiyang ingkang sami padudon lan kerengan punika rencang sae, mboten mengsahan kados wonten ing filemipun.

Kapan filem-filem sanes niru filem-filemipun Jacky Chan, kagem mbiyantu tiyang sepuh paring pangertosan putra-putranipun ingkang dereng saged mbentenaken nyata utawi namung apus-apus.

Pungkasanipun Kepanggih

2008-08-05T22:10:00.004+07:00

Sampun pinten-pinten wulan kula mboten saged nambah seratan wonten blog punika, menika amargi kawula piyambak kesupen username lan passwordipun. Mugi panjenengan sami saged mangertos sebab tiyang sepuh mekaten kathah kesupenipun, sebab prosesor lan ram ipun sampun out of date, ugi kapasitas harddisk kawula pancen alit, perlu dipun upgrade malih.
Kawula namung saged nambahi seratan lan paring pesen wonten ing shoutbox mawon. Wonten shoutbox punika kula ugi sampun nyuwun tulung, sinten kemawon ingkang saged paring pitudhuh caranipun mundhut password kula. Matur nuwun dateng mas Jamal ingkang sampun paring seserepan cara mundhut password ingkang ical punika. EEEE... lha dhalah, jebul sanes passwordipun ingkang kula kesupen, nanging user name (alamat email) ipun ingkang kula kesupen. Pengalaman kawula punika saged damel seserepan dumateng panjenengan sami, supadhos mboten kathah-kathah damel alamat email. Menawi kekathahen, lha kadhos kawula punika, kesupen, alias lali. Blaik tenan menawi kadhos mekaten tho para sedherek.......
Wekdal nderek TOT wonten ing SMK 2 Kendal, ndelalah manggenipun wonten ing lab komputer ingkang full internet, sanajan mboten full AC nanging mboten punapa-punapa. (Sajatosipun kula mesakaken ibu Senior Trainer, menawi paring pangandikan sekedhik sanget malah kepara mboten wonten ingkang migatosaken, termasuk kula. Nyuwun pangapunten nggih bu... mugi-mugi panjenengan pinaringan jembar manahipun). Wonten mrika, kula saged nguthak lan uthek user name lan password kanthi bebas mardhika sebab mboten perlu wongsal-wangsul ningali billingipun. Pungkasanipun menapa ingkang ical kepanggih malih.
Kanthi saged dipun editipun blog punika, Insya Allah kawula badhe nyerat malih. Mboh samangkeh badhe wonten ingkang maos menapa mboten.

NASIB WARSA ENGGAL HIJRIYAH LAN JAWI

2008-02-08T21:14:00.000+07:00

Penanggalan ingkang dipun kenal dening masyarakat Indonesia wonten tiga, Masehi, Hijriyah, Jawi lan Cina. Penanggalan Hijriyah lan Jawi menika prasasat mboten wonten bedhanipun kejawi angka tahunipun, penanggalan Jawi langkung kathah tinimbang penanggalan Hijriyah. Pramila, wonten tigang prengetan warsa enggal, warsa enggal Masehi ingkang dhawah tanggal 1 Januari, warsa enggal Hijriyah lan Jawi ingkang dhawah tanggal 1 Muharram / 1 Suro, lan warsa enggal Cina utawi asring kasebat Imlek (nyuwun pangapunten, kula mboten paham sistem penanggalan Cina, warsa enggal menika dhawah tanggal 1 wulane punapa. Menawi sedherek-sedherek wonten ingkang mangertos, mangga saged paring seserepan kagem kula ingkang cubluk punika).

Saben prengetan warsa enggal, pemerintah Indonesia netepaken dinten punika dinten libur nasional. Wonten ing tanggalan utawi almanak kacithak kanthi werni abrit. Prengetan warsa enggal Masehi dipun prengeti kanthi gumebyar. Wonten ing TV-TV, hotel, restoran, lapangan-lapangan dipun wontenaken perayaan arupi pentas musik, pesta kembang api, nyebul trumpet lsp. Wonten TV lan radio nggih mboten kalah meriah, artis-artis terkenal dipun dugekaken kagem damel semarakipun warsa enggal. Enem, sepuh, jaler, wadon sedaya mahargya dhatenge warsa enggal 1 Januari.

Perayaan Imlek utawi warsa enggal Cina ugi mboten kalah meriah. Mercon, barongsai, angpao, lampion lsp mboten nate kantun ndherek mangayubagya duginipun warsa enggal. Wonten acara TV, prasasat sedhaya stasiun TV ngumandhangaken meriahipun prengetah perayaan Imlek. Nuansa (basa Jawinipun napa nggih?) Cina ketawis sanget wonten ing layar kaca TV. Abrit, lampion lan barongsai. Para pawartos lan para pranata adicara ingkang njedhul mesthi mboten kesupen ngagem busana Cina. Filem-filem Mandarin ugi tansah dipun setel ngantos setunggal minggu kagem mrengeti tahun baru Imlek punika. Ingkang mrengeti mboten warga etnis keturunan Cina kemawon, tiyang Jawi nggih mboten sekedhik ingkang ndherek mangayubagya warsa enggal Imlek.

Lajeng pripun nasibipun warsa enggal Hijriyah lan Jawi? Mrihatinaken. Sepi saking perayaan lan ugi saking pemberitaan. Pancen warsa enggal Hijriyah lan Jawi punika mboten idhentik kalihan keramean, nanging langkung caket kalihan mawas dhiri, mbiji tumindak ingkang sampun dipun lampahi wekdal setahun ingkang sampun kalampah, kagem kaca benggala sangunipun gesang wonten warsa ingkang badhe dhateng. Hijriyah ugi ngemu teges pindhah, saking samubarang ingkang kirang sae tumuju tumindhak ingkang sae. Sakperangan tiyang Jawi nyambut dhatengipun warsa enggal kanthi lek-lekan, kungkum lsp. Wekdhal ingkang sae kagem njamasi pusaka. Nanging, pawartos ngenani warsa enggal Hijriyah lan Jawi wonten ing media massa benten sanget kalihan prengetan warsa enggal sanesipun. Menawi panjenengan mirsani TV wekdal prengetan warsa enggal Hijriyah lan Jawi, prasasat mboten wonten bentenipun kalihan adicara ingkang dipun siyaraken kaliah dinten sanesipun. Menawi kula kepareng mbiji, media massa Indonesia khususipun TV sampun tumindak jahat kanthi perlakuan ingkang mboten sami antawisipun warsa enggal Hijriyah lan Jawi kalih warsa enggal sanesipun. Kados warsa enggal Hijriyah lan Jawi punika mboten wonten, mboten dipun reken. Kangmangka, tiyang Islam wonten ing Indonesia punika paling kathah (mayoritas). Tiyang Jawi ing Indonesia ugi langkung kathah tinimbang tiyang saking suku lan etnis sanesipun. Nanging kenging punapa kok tiyang Islam lan Jawi ingkang kathah cacahipun mboten saged paring warna wonten ing prengetan warsa enggalipun.

Sedhih ati punika menawi ningali dhene tiyang Islam kathah ingkang mboten mangertos kalihan warsaipun, napa malih kok mrengeti. Semanten ugi tiyang Jawi kathah ingkang mboten mangertos kalihan penanggalan Jawi. Warsa enggal Hijriyah lan Jawi lumampah tanpa prengetan, tanpa pemberitaan. Warsa enggal utawi warsa lawas, sami mawon, mboten wonten bentenipun. Langkung mangertos penanggalan Masehi lan Cina tinimbang penanggalanipun piyambak. Langkung remen mahargya warsa enggal Masehi lan Imlek tinimbang mahargya warsa enggal Hijriyah lan Jawi.

Sinten malih ingkang badhe mrengeti, lan mangertos wontenipun penanggalan Hijriyah lan Jawi kejawi tiyang Islam utawi tiyang Jawi piyambak.

ISUK TEMPE SORE DELE

2008-02-08T21:06:00.001+07:00

Kagem tiyang Indonesia, mesthi kemawon sampun asring mireng, persa lan dhahar tempe. Tempe saged dipun damel lawuh anggenipun dhahar, ugi saged damel cemilan. Tempe goreng, sanajan namung dipun goreng, raosipun nggih sampun eco, napa malih menawi tambah dipun bumboni dados mendhoan, miturut pak Bondan Winarso raosipun mak nyyussss.....

Tiyang Indonesia umumipun dhahar tempe, paling mboten kaping setunggal pendhak minggunipun. Sebab regine murah tur nggih nilai gizinipun kathah. Tempe saged dipun damel sumber protein nabati. Nilai gizi tempe meh sami daging. Nanging tempe mboten bakal dipun temoni wonten ing restoran-restoran ageng utawi hotel berbintang. Sebab tempe idhentik kalihan panganan tiyang mboten gadhah, mboten pantes dipun sogataken wonten ing restoran utawi hotel berbintang.

Tempe ugi nggadhahi konotasi ingkang awon. Tuladhanipun ukara "mental tempe". Mental tempe ngemu teges menawi tiyang menika jirih, mboten kendel, gampil luntur semangatipun, mboten wantun ngadhepi tiyang sanes utawi ngadhepi kahanan. Tiyang ingkang gadhah mental tempe temtu kemawon mboten bakal saged maju lan mboten saged berkembang. Jalaran saking konotasi awon tumrap si tempe wau, tiyang kathah ingkang mboten nggadhahi selera dhahar tempe, mbok menawi ajrih menawi mentalipun dados mental tempe. Utawi saged ugi ajrih menawi drajatipun utawi ajining dhiri mandhap amarga dhahar tempe. Wonten malih paribasan "esuk dhele sore tempe", ingkang tegesipun tiyang ingkang remen mencla mencle. Tempe sami kalih mencla mencle.

Wonten ing wulan Januari 2008, regi dele mindhak ngantos udakara 100 %. Sakperangan kathah dele ingkang sumebar ing Indonesia punika dipun dugekaken saking manca, kadosta saking negari Amerika. Wekdal punika Amerka nembe nemahi krisis, pramila dele ingkang badhe dipun kintun wonten ing Indonesia mboten saged lancar, lan dele dados barang ingkang langka, reginipun lajeng mumbul.

Dele menika bahan kagem damel tempe. Temtu kemawon menawi tempe reginipun nggih ndherek mindak, ukuranipun suda sansaya alit, lan barangipun nggih angel dipun padosi. Sebab, tiyang ingkang damel tempe mboten kiyat kulak dele ingkang reginipun mboten mundhak malih, nanging gantos regi. Wonten Jakarta tiyang ingkang gadhah usaha damel tempe ngantos demo lan mogok mboten damel tempe. Sebab kanthi awisipun regi dele, pabrik tempe mboten saged damel tempe malih.

Kalodhangan punika kedah saged dipun waos dening para among tani. Bilih nanem dele punika saged ngasilaken. Reginipun awis lan tasih arang tiyang ingkang ngginakaken kesempatan punika. Kagem para mudha ingkang nembe pados pakaryan, mangga nyobi tetanen. Makarya ngupaya jiwa mboten kedah dados pegawe utawi karyawan. Dados petani uga mboten ina.

Menawi dipun tingali, wekdal sakpunika sampun langka sanget nem-neman ingkang kepingin dados tiyang tani. Mboten wonten lare alit ingkang nggadhahi gegayuhan (cita-cita) dados tiyang tani. Kadosipun, pakaryan tani punika andhap sanget drajatipun. Sakmenika ingkang taksih kersa njegur sawah, ngolah siti biyasanipun ingkang sepuh-sepuh. Saksampunipun tiyang sepuh-sepuh punika seda, umumipun anak putunipun mboten kersa nerusaken tetanen. Sawah utawi tegalanipun dipun sade, damel tumbas kendaraan utawi sanesipun.

Mboten saged dipun bayangaken 10 tahun malih, regi-regi bahan pangan. Menawi lahan tetanen sansaya ciut, dene ingkang saya ngrembaka pabrik kaliyan perumahan, ingkang dipun bangun sak inggile siti persawahan utawi tegalan. Bahan pangan kadosto beras, dele lan sakpanunggalanipun kedah dipun kintun saking manca (impor). Menawi pangan mawon dipun impor, kiamat bangsa Indonesia sampun caket, negari sanes saged gampil anggenipun ndhikte negara niki.

Pramila, ingkang taksih gadhah siti ingkang arupi sawah utawi tegalan, mangga dipun jagi tetep saged dados lahan ingkang produktif, sampun ngantos dipun gantos fungsinipun. Ingkang kagungan rejeki kathah, mangga sami mundhut siti sawah utawi tegalan lan dipun ginakaken kagem tetanen. Mugi-mugi, Indonesia saged swasembada pangan, mirah sandang mirah pangan, gemah ripah loh jinawi.

WARSA ENGGAL (Tahun Baru)

2008-01-06T17:30:00.000+07:00

Wonten ing wulan januari punika, wonten kalih prengetan wars enggal, inggih punika warsa masehi tanggal 1 januari 2008 lan warsa hijriyah/jawi.
Ing prengetan warsa enggal masehi ingkang sampun kelampahan, sagen dipun pirsani meriahipun prengetan punika. Wonten panggung hiburan, pista kembang api, wonten TV-TV aln sakpanunggalane meriah sanget. Ananging menawi mirsani kerameyan wau, ati kok nggih keranta-ranta, nalika mirsani wonten ing pawartos TV, serat kabar lan radio, sedherek wonten ing karanganyar, solo, ngawi lan kathah panggenan malih nembe nemahi musibah kadostho siti longsor, banjir, angin ribut lan sanesipun. Punapa tiyang-tiyang ingkang sami bingah mrengeti wars enggal punika mboten saged ngraosaken? Arta kagem nanggap pentas, nyumet kembang api lan pesta sanesipun punapa mboten langkung sae dipun damel mbiyantu sedherek ingkang nembe nemahi musibah.

Mangga, ngadhepi warsa enggal hijriyah/jawi tanggal 1 muharam/1 suro, kula panjenengan ngaca punapa kemawon engkang sampun kelampahan wonten ing warsa sakderengipun, lan ngadhepi warsa ingkang badhe kelampahan kanthi sae.

Pemanasan Global

2007-12-01T06:34:00.000+07:00

Gambar menika mboten dipun damel/rekayasa. Pancen menawi siang putra kula menika remen sanget tilem kanthi nglebetaken sirahipun wonten lemari es, margi griya kula pancen dereng saged pasang Air Conditioner utawi AC. Pramila, tilem wonten nglebet lemari es menika kados tilem wonten ruangan ingkang wonten AC nipun.

Menawi kula panjenengan raosaken, pancen suhu udara menika sansaya dhangu sansaya tambah benter/panas. Wonten daerah asal kula ingkang nggadahi inggil sekitar 1000 m dpl, rumiyen kraos asrep sanget. Nanging sakmenika, menawi kula wangsul dateng daerah asal kula, raosipun sumuk sanget, panas. Semanten ugi wonten dhaerah pesisir raosipun saya dangu ugi sansaya panas mawon.

Wonten daerah ingkang iklimipun sedang, kadosta wonten ing negari-negari eropah, hawa panas menika ngantos nemahi korban pejah. Korban pejah menika amargi mboten kiyat ngempet raos panas. Hawa panas lan adhem wonten daerah menika tebih sanget bentenipun. menawi adhem ngantos sakngandhape 0 derajat celcius, nanging menawi panas ngantos langkung saking 50 derajat celcius.

Panase ngalam ndonya menika menawi dipun tingali sejatosipun nggih dipun damel dening manungsa piyambak. Makhluk sanes mboten wonten sangkut pautipun kalih pemanasan global punika. Tingkah polah manungsa ingkang dados penyebab pemanasan global menika kadosto:
1. Industrialisasi2. Transportasi
3. Risakipun lapisan ozon
4. Pengrusakan alas.

Industrialisasi menika ngedahaken wontene mesin-mesin ingkang ngasilaken polusi arupi gas carbon dioksida, karbon monoksida lan gas gas sanes nderek nyebabaken hawa sansaya panas. Sarana transportasi dharat, laut lan angkasa ugi ngasilaken polusi. Kangmangka sakmenika jumlah alat transportasi menika mboten sansaya sekedhik, nanging sansaya kathah. Lapisan ozon menika lapisan udara ingkang saged nyegah mlebetipun radiasi saking srengenge ingkang mboten dipun ginakaken. Lapisan menika minangka songsong/payung kegem ngayomi sakkabehing mahluk supados mboten kepanasen. Nanging menawi payung punika sampun risak/bolong-bolong, mesthi kemawon radiasi panas saking sang surya tembus ngantos bumi. Ingkang dipun kawatiraken malih menawi pemanasam menika ngajeraken es ingkang wonten kutub lor/kidul. Temtu kemawon menawi es kutub ajer, toya segara badhe minggah, lan kathah daratan ingkang kleleb. Risakipun lapisan ozon menika paling kathah dipun sebabaken gas freon ingkang saged ngrisak gas ozon. Dene gas freon wau, kathah dipun ginakaken wonten ing AC, lemari es, alat-alat semprot lsp. (Kulkas kula non CFC/freon).

Alas menika kados paru-parunipun donya. Ginanipun kejawi kagem nyimpen toya udan, ugi kagem nyaring lan ngresiki udara ingkang reged lan ngandhut polutan. Menawi alas menika sansaya sekedhik, artosipun paru-paruning donya sansaya alit, pramila mboten saged nyaring polutan saking udara.

Sumangga sakmenika kula panjenengan ndherek ngupaya pemanasan global menika mboten kedlarung-larung kanthi cara-cara ingkang saged kula panjenengan lampahi. Umpamanipun ngirangi ngginakaken kendharaan bermotor, ngirangi ngginaaken freon, lan nganakaken penghijauan kanthi nanem taneman wonten lingkunganipun piyambak piyambak.

Seratan menika kagem nyengkuyung wontenipun Konverensi Perubahan Iklim ingkang dipun wontenaken dening PBB ing Nusa Dua Bali, tanggal 3 Desember 2007.

Mengapa Jawa (sanes Mengapa Dua, niku lagu ndangdut)

2007-11-25T22:53:00.000+07:00

Mbokmenawi panjenengan gumun, kok nggih tasih wonten tiyang ingkang nyerat blog mawi basa Jawi. Mesthi menika tiyang ndesa, kuno, ketinggalan jaman, mboten umum, lan sanes-sanesipun. Kula piyambak sakjane nggih bingung, mutusi basa kangge nyerat wonten blog mriki. Badhe ngagem basa Inggris, rasane kok kirang pas. (sithik sithik kula nggih mboten saged basa Inggris lho :b ). Badhe ngagem basa Indonesia, kadhosipun kok sampun kathah, tur kirang keren miturut kula. Lajeng kula putusi menawi blog menika ngagem basa Jawi. Menawi dipun sawang kadose nggih melawan arus, nanging mboten mangertos kula kok rumaos bombong nyerat ngagem basa Jawi.
Kula sadhar, sak sadhar sadharipun, menawi blog basa Jawi ngoten mboten bade kondhang, mboten kathah tamunipun, paling nggih mung dipun waos piyambak, kalamangsa anak lan bojo ingkang dipun kengken maos. Lha pripun malih, tinimbang kula ndamel blog ingkang bertentangan kalih ati sanubari kula piyambak, kula terusaken mawon ngagem basa Jawi. Idhep-idhep nguri-uri kabudayan Jawi, supados tiyang Jawi mboten ical Jawinipun.
Wondhene postinganipun nggih napa wontene kemawon, wong babagan komputer niku kula nggih mboten patosa prigel. Sampun kathah mas-mas lan mbak sarta bapak-bapak ingkang andhum ngelmu babagan komputer wonten blogipun. Raosipun kok kula niku cubluk lan bodho sanget babagan komputer nalika kepanggih mas-mas, mbak-mbak lan bapak-bapak wau. Badhe kula alih basakaken, nanging kula kok mboten wantun menawi mangkih malah dipun kinten melanggar kekayaan intelektual. Pungkasane lha namung menika ingkang saged kula serat, caturan ngalor ngidul, ngetan bali ngulon, sakpenake kula piyambak. (Nek tak raosaken kok malah kados wong edan nggih :D )
Mbok menawi para maos wonten kabar ngenani blog ingkang ugi ngagem basa Jawi, keparenga kula dipun paringi ngertos, khususipun saking tanah Jawi, langkung sae malih menawi wonten ingkang saking Suriname, negara Walanda utawi negara pundi kemawon. Kula rumaos matur nuwun sanget menawi wonten blog ingkang sak nasib lan sakpenanggungan kaling blog niki.

Nyerat Blog

2007-11-22T15:15:00.000+07:00

Pancen nyata, yen nyerat wonten blog menika benten sanget kaliyan nyerat wonten media sanesipun. Kados seratan kawula punika, menawi dipun waos, napa malih panjenengan, kula piyambak nalika maos seratan kula nggih ngguyu, raosipun kok wagu, lucu lan saru. Nanging sanajan awon, tetep kemawon seratan punika dipun publikaseaken mboten namung saindhenging nuswantoro, nanging ugi ngantos manca nagari. Menika hebatipun blog. Saben tiyang saged ngedhalaken isi atinipun kanthi bebas merdhika.
Umpamanipun seratan kawula menika dipun paringaken wonten ing layang kabar utawa kalawarti, mesthi kemawon mas redaktur langsung mendhet korek lan dipun sumet seratan kawula ngantos lebur ajur mumur dados awu. Sebab, menawi dipun pikir, seratan menika isinipun ngalor kalih ngidul mboten wonten tujuanipun kadostho layangan ingkang pedhot. Lha pripun malih tho mas/mbak/pak/bu/mbah/eyang/dhik, saged kawula nggih namung menika. Bejanipun kok wonten blog, kadostho www.blogger.com punika, kula saged nyerat menapa ingkang kepingin kula serat, punapa ingkang njedul saking saklebeting ati, muncrat saking akal lan pikiran kula, kanthi jaminan mesthi badhe dipun publikaseaken sak ngalam ndonya. Sanajan ugi mboten wonten jaminan wonten tiyang ingkang maos. Menawi panjenengan maos seratan punika mbok menawi merga panjenengan kesasar. Nanging umpama mboten wonten ingkang maos, nggih mboten menapa-menapa, mangkih tak waos piyambak sanes wekdal. Sebab kula nggih ngrumangsani, tiyang cubluk ingkang gadhah gegayuhan gedhuwuren, go public lewat internet.
Sejatosipun kula nggih nate ndamel blog wonten multiply lan wordpress. Nanging mandheg sarana dhananipun ingkang cupet. Ati karep bandha cupet. Jer basuki mawa bea. Dhene blog menika saged kawujud karana sekolahan panggenan kawula nyambut damel tumbas chip XL khusus internet. Sayangipun kok mung setunggal wulan thok, wong namung damel pembelajaran murid-murid. Kula sedhih sanget, saksampunipun telas wulan punika taksih saged nyerat wonten blog menika malih napa mboten. Dongakke mawon nggih para maos, kula pinaringan rejeki kagem lengganan internet piyambak. (salahe internet kok larang).
Oh ... nggih nyuwun pangapunten nggih kula kok malah nglantur anggenipun ngudarasa. Wangsul malih dhateng masalah blog, saking bebasipun tiyang nyerat wonten ing blog, wonten ugi tiyang ingkang nyerat tanpa dipun landesi raos tanggung jawab. Kula nate mbikak salah satunggaling blog (mboten perlu kula sebut) ingkang isinipun gambar-gambar porno. Cilaka sanget yen kebebasan blog dipun manfaataken ingkang mboten-mboten. Temtu kemawon nerak paugeraning negara lan agami, nggih tho..?
Nanging kula nggih salut (basa jawinipun napa nggih?) taksih wonten tiyang ingkang nyerat blog kanthi tujuan nyebaraken ngelmunipun, tiyang sanes saged antuk ngelmu saking blog menika, contonipun wonten edittag.blogger.com, lan sanes-sanesipun ingkang mboten saged kula sebat setunggal lan setunggalipun.
Mugi-mugi, kanthi nyerat wonten ing blog, saged damel sarana andum ngelmu. Nanging nyuwun sewu, kula piyambak namung ngangsu ngelmu saking blog-blog tiyang sanes, sebab kemampuan kula nggih namung menika. Mugi-mugi ingkang nyerat blog kagem kesaenan tansah pinaringan rahmatipun Gusti, ingkang nyerat lan pasang gambar porno wonten blog pinaringan eling, sadar, lan ngowahi isi blogipun. amin.

Nalika kenal internet

2007-11-10T22:03:00.002+07:00

Tembung internet punika sampun wongsal-wangsul mlebet talingan kiwa, medasl talingan tengen. Saking berita wonten radio, televisi, koran lan ugi guneman rencang. Mboten kenal wayah, enjang, siang, sonten lan ndalu. 24 jam sedinten, 7 dinten seminggu, 5 minggu sewulan, 12 wulan setaun, 8 taun sewindu, tembung internet prasasat mboten nate mundhut cuti saking thek kliwering pawartos.
Sejatosipun kula piyambak nggih dereng mudheng sanget tegesipun internet punika. Nanging, nalika kawula mirsani filem ingkang dipun bintangi dhening mbak Sandra Bullock kanthi irah-irahan THE NET, kawula gadhah pemahaman ingkan awon tumrap internet. Internet punika kados dhemit ingkang medheni. Dipun gambaraken wonten filem punika, data pribadhi tokoh pawestri ingkang manggen wonten ing pusat data komputer ingkang kesambung ing internet, dipun owahi tiyang sanes, temtu kemawon ingkang mboten tanggel jawab. Mulai asma, alamat, tanggal lahir, ugi cathetan kriminalipun dipun gantos, ingkang waune sae dados awon. Tundhanipun, tokoh kalawau dipun oyak-oyak dhening pulisi, petugas imigrasi, dinas sosial lan ugi tiyang ingkang gadhah maksud jahat kala wau.
Saksanese filem The Net, ugi tasih kathah filem ingkang gegayutan kalian internet kadosto Paycheck, lan sanes-sanesipun (kula mboten apal sedhanten irah-irahan filem wau). Wosipun, internet saged dados sarono kejahatan. Punapa ingkang wonten internet mboten wonten ingkang saged dipun rahasiaaken malih. Menawi mlebet dhateng internet, kedah siap nampi risikonipun.
Saksanesipun wau, wonten internet ugi paring kathah gambar lan informasi sarto crito kang kalebet pornografi. Gambar-gambar tiyang wadon tanpa busana, jaler wadon nembe andum katresnan, sarta crita babagan hubungan badhan ugi dipun sediaaken. Menawi ingkang mirsanai lan maos isi web wau lare ingkang dereng jangkep umuripun, lha rak nggih marakake cepet diwasa tho........
Ananging saksanesipun ingkang kula aturaken wau, nyata yen internet menika kathah ginanipun. Tuladhanipun menawi bade pados ngelmu menapa kemawon ugi sampun sumadia, badhe sesambetan kalian sinten kemawon sak jembare jagad ugi saged, saestu menawi internet punika ugi kathah manfaatipun.
Sakmenika namung kula lan panjenengan ingkang mutusi, badhe ngginakaken internet kagem ngupadhi kesaenan utawi ngupadhi keawonan.
Becik ketitik, ala ketara.
nuwun

SUGENG RAWUH

2007-11-10T20:45:00.000+07:00

Dumateng para guru lan karyawan SMP 2 Brangsong, sugeng rawuh ing lan sugeng pepanggihan malih.
Menawi panjenengan saged maos seratan punika, ateges panjenengan sampun kasil mbikak salah sawijining layanan internet ingkang dipun sebat WWW, inggih punika layanan ingkang nyuguhaken maneka warna pawarta ingkang awujud seratan, gambar, suanten lan ugi gambar polah.
Saklajengipun sumangga panjenengan pados pawartos sanesipun kanthi mbikak link wonten ing kaca punika, utawi kanthi ndugeni alamat-alamat sanesipun.
semanten saking kawula,
kaliwungu, Setu legi, 10 Nopember 2007

Jaitoe Rochman,